خلخال2

 
عجب شعری
نویسنده : میرهادی خلخالی زاویه - ساعت ۸:٥٥ ‎ب.ظ روز دوشنبه ۳٠ آبان ،۱۳٩٠
 

شعر "قدیم گونلر" سروده برادر فرزانه ام سید یعسوب خلخالی است که  یاد روزهای دور اما خوش کودکی در روستای زاویه سادات را بیدار می کند.تقدیم به همه عاشقان وطن.

 

قدیم گونلر

 

گلون سیزه یوردوموزدان سویلیوم

سیزی او کنده آشنا ایلیوم

الیم بوشدور اوزوم قارا نیلیوم

آرزولار اورگیمده  قالدیلار

هر نه منه ویرمیشدیلر آلدیلار

 

بسدور سیزه  سویله دیم   گچمیشلردن

قوی سویلیوم  اوز گوردوگوم  ایشلردن

خردادلاردان   مردادلاردان   دی لردن

اوشاقلیقدان  بری باشیمدان    گیچوب

ایندی که هشتاد ایل   یاشمدان   گیچوب

 

سحر دوروب شور چورگی ییردیم

وطن  چاریق شال جورابی گیردیم

قیشدا قاردا یوقوشا  لوکلیردیم

لعل و زردن  قرآن درسی آلماقا

هجه لیوب یاخشی روان اولماقا

 

 روحنا رحمت ایله آرواتلارون

گونی قارا وجودی خیراتلارون

یادی خوش اولسون ایله میقاتلارون

روحوموزا اوردا صفا ویرردیک

اورک گوزیله آلاهی گورردیک

 

سید آصف الیندن مشق آلمشام

اوچ آی اونون مکتبینده اولموشام

تاریخ معجم ازبرنده قالمشام

خطاطیدی گوزل خطلر یازاردی

قارقادوزی اوسته مهور قازاردی

 

حاج ابراهیم حکیم لردن یادگار

کتده اتدی مکتبینی برقرار

کند اولمادی مزاجنه سازگار

تجوید درسین ویرردی واضح قشنگ

افسوس اجل فرصتنی قیلدی تنگ

 

سید مفید  پور آقای کبیر

درس ویرردی امثله صرف میر

آپارمیشام علمیندن فیض کثیر

علمون که یوخدور پولنان قیمتی

عالم لرون بهشت دور اجرتی

 

سید نصیر عالم علم جدید

زحمتمی چکوب زمانی مدید

واریمدی درسنه عشق شدید

حیف زمانه اقتضا ایتمدی

درس اوخوماق منن یولا گیتمدی

 

دوردوننده چوح محبت گورموشم

دوردنه ده چوخلی زحمت ویرمیشم

دریالریندن قطره اخذ ایتمیشم

حدیث دور مسلمان عالملری

افضل دی تا یهود پیمبرلری

 

زیوه نون خطاط لاری  روحی شاد

میربهشتی  سید آصف  میرعماد

هر اوچی نستعلیق خطینده اوستاد

افسوس که هیچ  اثرلری قالمیوب

آدلارینی دفتر اوسته سالمیوب

 

قیش گونلری  وار داملارون صفاسی

قار توکمه سی  قار گوله  اویناماسی

باخا فرحلنه  آتا  آناسی

یالواراردیق رکلی قاتما آلاردیق

توپ سروردوک داملاردا توپ چالاردیق

 

قار یاقان گون سحر سحر دوراردیق

باغی داغی بیر بیرینه ویراردیق

ککلیک گوروب قوسقوسیندا دوراردیق

اول قاری تمیز تمیز کورردیک

سورا دوزاخ قوروب چینه سپردیک

 

ننم گیجه طاباقا اون الردی

دوزسو قاتیب  اونی خمیر ایلردی

اویاق قالوب  خمیری گوزلیردی

اولما بیردن گیجه  کوپه  داشلانا

یا تورشیا  یاپان زمان   آشلانا

 

سحر دوروب تندیری تیز سالاردی

تزک کرمه نی  تندیره قالاردی

کونده سالاردی تک یایوب یاپاردی

چورک ایی  قوزاناردی   تندیردن

پیشیک میو میو سالاردی بیردن

 

آخشام مرجی سیلردی ایسلاداردی

سحر اونا  ککلیک اتی  قاتاردی

داش بارداخدا  داغ تندیره  آتاردی

پیشن مرجیله  پیشسه   ککلیک اتی

داماغوندان  هرگز  گیتمز  لذتی

 

فندقنان سقه ویردی اویناردیق

گاهی اوتوزدوراردیق گاه  اوتاردیق

دنن هاچان اویناماقدان دویاردیق

آخشام اوستی سویوخ سازاخ چخاردی

بورنوموزون شیرتاناقی آخاردی

 

ملا هرای ، گزلن پاچ، تولا ویردی

پیشیک دویدی ،ایشک بیلی سیندیردی

بادام بادام ،بورک قاپدی ،زنجیر قردی

اویناریدیق چوخ محلی اویونلار

اونودموشام قالوب یادیمدا بونلار

 

خدرنبی  گیجه قووت اله مک

شمع یاندیرماق چراغلاری پیله مک

نذرایله مک اونان دیلک دیلمک

یوخی کیمین   قالیبدلار  یادیمدا

هرنه که   گورموشدوم   اوشاقلیقیمدا

 

باغلار کنارندا  گیلدیک   کوللاری

باغلامیشدی  بت بره نی   یوللاری

آغریماسین  گیلدیک درن   قولاری

دویمامیشام   هرگز  گیلدیک  آشنان

زاویه نون   لذیذ    قوهورماشنان

 

گل چرشنبه آخشامی اود  یاندرماق

اود اوستوندن   آتانماق   آتاندرماق

فشفشیا اود ویروب    تولاندیرماق

اوشاقلارون   اورگینی   شاد ایدر

محبتلی    گوگول لر   ایجاد ایدر

 

چهارشنبه گونی سودان آتیلماق

سرین سووا بیر بیرینی باتیرماق

تزه پالتار گیوب بولاغدا دورماق

چوخ گوزل  رسم دور  بیزیم محالدا

آرواد اوشاق آراسیندا   خلخالدا

 

قویاردلار کورسی اوسته هر ایوده

رکلی یومورتا  گردکان و ایده

اوشاقلارون گوزی قالاردی گویده

تا بیر قورشاق باجادان سالاناردی

بیر شال قاپاردی داما یولاناردی

 

چرشنبه دن سورا بایرام   گلردی

ایل دولاناردی   طبیعت   گولردی

کایناتون   حالی   گوزل لنردی

خلق گیدردی   بیربیرین   گورمگه

گویلی سنیق    اوزلری   گولدورمگه

 

آخشام چاقی سوری کنده گیرنده

قاش قارالوب گوز گوزی گورمینده

بالاسیچون    قویونلار     ملینده

کنده   دوشردیک    قوزی آختارماقا

آزقین گیدن    قوزولاری    تاپماقا

 

گون چیرتاندا  سوری  کتدن   چخاندا

چوبان چولچی    گرایلی    اوخیاندا

توکز خالا   پالازین    توخیاندا

تیز آپاریب     قویونلاری    قاتاردیق

قاچیرداردیق    تا سوریه    چاتاردیق

 

گون اوزاندی    لاپ توکندی    سویوقلار

کرچ دوشدیلر     یموردیان    تویوقلار

باسدیراردی     تویوقلارینی   چوخلار

کت    دولاردی   قدقد جیک جیک   سسیندن

گورن    قنتلنردی    هوسیندن

 

سویوخ گیدردی    ایسدیلر دوشردی

باغ باغچادا     آقاشلار    گللشردی

یوادا     قوش بالاسی      توکلنردی

دولدوراردی هوانی   قوشلار سسی

شیدا اولان     بلبللرون    نغمه سی

 

دولی یاقاردی    چایدا    سیل گلردی

خره سو     اژدها کیمین      ملردی

باخان    قورخاردی  واویلا  چکردی

خلق آغلاشاردی   آما بیز  گولردیگ

هر نه نی    مضحکه  حساب  ایدردیک

 

یازدا ویراردیق  بیر بیره  کوشنی

تاپوب    چخارتماقا    کندیر  گونی

اونان    توخوردولار ایپی  اولکنی

نه یاخشیدور خودکفالیق   دوره سی

اوز داواسی  اوز دردینون   چاره سی

 

سو نوباسی  دونوب  بیزه  یتنده

گزیب سو اوسده  باش ویراردیق  بنده

گوندوز گیجه  بیری سویی  کسنده

یامان دیوب  بیر قیشقریق  سالاردیق

بل چکردیک  ورگانلاری  باقلاردیق

 

بویوک ننم  باغچادا  بال  کسردی

بالدان اوتور  لاپ  اورگی  اسردی

بال اولماسیدی  سفرادا  کوسردی

آی نه گوزل  گونلریدی  او گونلر

ایل الیله  آچیلاردی  دویونلر

 

درگزچیلر یونجالیقدا  چمنده

درگزلری قلولیوب  بیچنده

الفه الفه  بیر بیر اوسته   توکنده

ذوق ایلردیک  ایکاش  تیز  بویسیدیک

اولارتک  درگز ویرماقی   بیلیردیک

 

داغدا گیجه  بیچینچیلر  یاتاردی

آی چخاردی  دالینجا  گون باتاردی

نوروز علی آتا  خلور  چاتاردی

من گیدردیم  کنده  افطار گتیرم

آذان وریلممیش   داغا یتیرم

 

یاتاردیق  باغلاردا  پاییز اولاندا

آلما آرمود  یتیشوب  سولاناندا

چول دونقوزی  باغ باغچیا  دولاندا

خورتولتی  گلجگین   حلب چالاردیق

چخاردوپ  باغدان   ایشیگه   سالاردیق

 

معصوم باغیندا، یرکوکی  سورردیک

نارالاری  بللییب   دوشورردیک

تا بیر نفر   یولدان گیچن   گورردیک

نچه دنه  پای  اونون چون  آتاردیق

باتماننی  بیر قرانا   ساتاردیق

 

پاییز وارکن  چول ایشین   قورتارالار

سامان داشولا  داملاری    سوالار

قیش گلمه میش     ایل زومارین    یوالار

بیز تلسردیک  که  گون آخشام اولسون

پاییز چخسین   قیش چخسین   بایرام اولسون

 

پاییز فصلی   آلمالاری   درنده

بیر یرده  دج ویروب  گونه  ویرنده

شریک لره    بولوب    سبد لینده

بیزده  بویوک لره  کومک  ایدردیک

پایمزی آلوب  قویوب  گیدردیک

 

اوروشلوق  گیجه سی  آذانان  سورا

اوروشلار افطارین  آچانان  سورا

آلاه  چراغلاری  یانانان  سورا

بیز گیدردیک  باغ باغچیا  گزمگه

آقاشلاردان  گیرده شیرین  درمگه

 

سحر یایدا قیزیل گللر آچاندا

گونی گورمک  همان  شبنم اوچاندا

سولوب  گل  بلبلون  رنگی قاچاندا

دوشردی  یاده  عمرون  ماجراسی

جوانلیق عالمینون  نی نواسی

 

چناردان  آسلانان  بلبل  یواسی

گوزومدن  آسلانوبدور  محتواسی

ساری دمدیک  ایکی  توکسوز  بالاسی

نه لازم  سویلیوم  آخر  نجولدی

بسا  جان  پایمال  غفلت  اولدی

 

ایدنده  یاد  ککلیک لر   سسیندن

گوگول  پرواز  ایدردی  هوسیندن

دوشردی  یاده  شادلیق  دوره سیندن

ولی  ایندی  فقط  حسرت  قالوبدور

ردای  شادمانی  یرتلوبدور

 

یادوندا  یایدا  چایدا گول  قییرمک ؟

لوت اولماق  گونده  اون یول  چایدا چیمک؟

نه حالیدی  اوشاقلارا  ارینمک

سحر دوروب آخشامانجا  چاپاردیق

زیق  دوزلدیب ایوجیک ایوجیک اویناردیق

 

جگیرده  یای گونی  یونجا  بیچنده

آغ بولاغون  سرین سویون  ایچنده

دسته دسته  گوزل ککلیک  گیچنده

دوشردی  قهقهه  اوجا داشلارا

سکردیلر  یوقوشا  یاماشلارا

 

بیری که  عازم  انگان  اولاردی

باخاردی  بوغدیا  حیران قالاردی

اسنده  یل  زمی  یرقالاناردی

خداوندا  او نعمتلر  نجولدی

نیه  بیردن بیره هر زاد قوتولدی

 

یادی خوش  با صفا  ازنو بلاغی

بویوک چایون  بهشت آسا  قراغی

داغ گچینون  اوتاناقی  یاتاقی

تا که  برنو  تفنگی  جلوه لندی

نسلی کسیلدی  توخومی   توکندی

 

اوچوخ سویی  دولدورار  گوللر گولون

سوارار گوللرون  باغاتین   چولون

آلاه ویرن  نعمتون  قدرین  بیلون

تا الوزدن  ویردیگنی آلماسون

بوندان  آرتوق  مضیقیه  سالماسون

 

زاویه نون  داغی  چولی  دره سی

وجب وجب  یولی  بندی  بره سی

یادیمدادی  اوشاقلیق  خاطره سی

هر یرده اولسام  اوردادور  اوره گیم

چونکه  اوردا  گوتورولوب  گوبگیم

 

گیدنده  خلخالا   اوزون  یولاری

سبزه باساردی  ساقلاری  سولاری

باغلار  قراقینداکی  گل کوللاری

دوشن زمان  خاطرمه  سوزومده

رنگین کمان  جلوه لنور  گوزومده

 

اوستا حبیب  کندمزون  نجاری

خیش قورماقدا   یوخیدی  همقطاری

رحمتگون  بالتاسنون  شراری

یاندراردی  چنارلارون  ریشه سین

آقاج کسمک  ایله سیدی  پیشه سین

 

اوستا خاسار  کندمزون  جلفاسی

هر شاهیا  یوز یول  مکوک آتماسی

شال  توخوردی   آرشنی  دوردعباسی

هر نه  ویرسیدون  مزدنا  آلاردی

شکر ایلیوب   جبشدانا  سالاردی

 

اوست آقایار  کندمزون دللکی

اولگوجوندن  قان آغلاردی   باش توکی

دالیندان  انمزدی  خیروشر  یوکی

بیلردی  کتدینون  غمین  اوز  غمی

تویدا  یاسدا  مجلسلرون  گورکمی

 

کابلا طبیب   کندون  قوروقچوسیدی

ناکامیدی  هرکیم  چول  اوقروسیدی

اوشاقلارون  گوزونون   قورخوسیدی

رحمتیک  تیز  ایری  ایی   دوزلردی

مزرعه نی   دقت ایله  گوزلردی

 

مش سبزعلی  کندمزون  چوبانی

چوبانیقدا   گیچیرتمیشدی دورانی

کندون  یولوندا  قویموشدی  جوانی

صفا  و  صدقله  خدمت  ایدردی

آخشام  لاواشلارین  آلوب  گیدردی

 

ویران اولوب  او شانلی  دودمانلار

الدن گیدوب  او نام و او  نشانلار

وحشت باسار  اوردان  گیچن  زمانلار

هامی کوچوپ  نه سس گلور  نه صدا

نه باغمان وار  نه گزمه   نه کدخدا

 

ایل کوچدی ایو اوچولدی یورد پوزولدی

اللریمیز بیر بیریندن اوزولدی

قافله لر دال بادالا دوزولدی

ترک ایتدیلر دده بابا دیارین

اونوددلار گیچنلر یادگارین

 

تلاش ایدون فراغت ایجاد اولا

خرابه لر دوباره آباد اولا

غصه یرینده  ایلیمیز شاد اولا

عبرت دوتون گیچنلرون ایشیندن

عاقل اولان  اورگنر  گچمیشیندن

 

ایشلیون تا صحرا دونسون گلشنه

قدیم لرتک ناخیل گلسون خرمنه

آباد اولسون داغیلمیش ایولر گینه

دیاریمیز دوباره آباد اولسون

خلفده تا سلف کیمین  شاد اولسون

 

 

                                                                            سید یعسوب خلخالی

                                                                                   متخلص به حباب